最近大家對AI又愛又恨，「愛」係佢真係好方便，「恨」係佢可能令你老闆都覺得好方便，隨時搶走埋你份工。不過，離AI當道可能仲要一段時間，但有好多職業就已經悄悄喺我哋身邊消失緊，而且你仲可能有份參與其中，你又有冇留意到依個改變？

1）侍應

未必會完全消失嘅職業，但隨住「電子落單」愈嚟愈普及，客人慢慢習慣咗掃QR code點菜，侍應嘅工作就只係剩返傳菜（仲未計有好多餐廳用機械人上茶）同執枱，餐廳一定會減少人手。見慣見熟嘅夥計少下一個又一個，連人情味都走埋，再搵唔返人手落單時嘅溝通同樂趣……

2）停車場管理員

政府2021年已經嘗試引入外國好流行嘅自動停車場，最近更正式宣佈喺深水埗興建提供170自動泊車系統泊位同30個傳統泊車位嘅停車場。因為停車場採用自動系統，司機技術要求停，少咗「Hi」花人地部車嘅機會，連偷車都十分困難，一個看更就睇一個車場都唔係問題。

3）球證

近年足球界迷思，究竟係球證定係VAR（Video Assistant Referee）執行判決，如果睇VAR判決，咁同觀眾喺屋企睇電視有咩分別？球證仲需唔需要存在？有球迷就質疑，如果連肉眼都分辨唔到嘅越位／犯規／出界都要準確判斷，遲啲使唔使精確到以納米為單位？成場波畀你搞彎曬喇！

4）收銀

人人都用電子支付，大型超市同傢俬店都設有自助付款通道，自助結賬機仲比人手收銀位多一至數倍，每一個選擇自助付款嘅人，就等同投咗「唔需要收銀員」嘅一票。個城市養少咗個人，消費者做多咗嘢，商品又冇平到……點解硬係覺得怪怪哋咁？！

5）導遊

香港導遊早前向內地遊客介紹香港資訊時錯誤百出，令人啼笑皆非，但佢哋遲啲可能都笑唔出。因為現今資訊科技發達，手機就係最佳嘅導遊，導航、導賞、玩樂推介齊全，仲有埋愈趨完美嘅翻譯功能。好多朋友出國旅行已經唔跟團唔請導遊，將資源投放喺租車，最多包一個司機，導遊已經慢慢變成過時嘅服務崗位。

6）銀行出納員

經過銀行，排隊嘅大部分都係長者，相反後生嘅都用櫃員機，甚至過數、理財都全部喺手機上完成。屋邨嘅銀行買少見少，取而代之係美其名嘅「自助理財中心」，無錯，又係客人自己服務自己。但銀行係咪唔請人？平時收到嘅銀行cold call證明只係銀行改變咗經營重心，由以往勸人儲錢，變成鼓勵人借錢投資，坐喺度服務你，不及閂埋門打電話搵客仔重要。