仲去麥當勞道打卡？仲跳《Flower》舞？全部Out晒喇！早前逢適五一勞動節假期，有唔少內地旅客跟住小紅書來港朝聖，除咗吃喝玩樂再上山頂，拍照打卡當然係不能錯過嘅重要一環！疫情前，內地網民喜愛到彩虹邨、中環摩天輪同PMQ打卡，早前就話到麥當勞道、油麻地警署門前影相，向香港娛樂文化致敬咁話。不過小編發現，呢股小紅書打卡熱潮，已經蔓延到尖沙咀中港城一帶，唔係為咗「濕平」，而係教你去辦公大樓做Body
 Check體驗服務。

相對於內地一般「過場式」簡單體檢而言，香港的體檢中心擁有較先進嘅醫療設備及檢查服務，檢測結果自然更準確，加上有專業醫護團隊負責檢查、分析報告、提供飲食建議等等，質素高下立見，因此吸引唔少內地旅客乘高鐵來港體檢，完成後更可以觀光購物，一日內滿足晒所有願望。由於油尖旺區如中港城至廣東道一帶、彌敦道及佐敦都較近高鐵站，自然更加受惠！

「跨境體檢」非新鮮事

旅客專程來港進行各類型預防醫學嘅檢測，呢種「跨境體檢」早於疫情前就已經湧現。唔少體檢中心都會於內地社交平台宣傳，向企業公司進行推廣。有醫療中心曾做過統計，有七成客戶來自內地，2018年最高峰時期曾一日有逾千名旅客到訪，生意激增。有部分中心更設專用窗口，為旅客進行登記，進行體檢後，更有機會即日取得報告。

唱旺行業 醫護職位勢增

油尖旺區的醫療及美容中心多藏身裝潢華麗、環境舒適嘅知名商廈，由踏進大廈門口一刻就開始體驗頂級體檢之旅，對旅客充滿吸引力。現時兩地通關，內地旅客均有意再來港接種HPV疫苗或進行醫療檢查，預料未來需求將會進一步增加，帶旺行業之餘，勢必增加職位空缺、拉高業界的薪酬和待遇！