返工想扮工？作為打工一族的你都試過一邊開住電腦Word 
file一邊打小遊戲或上網煲劇碌YouTube。但要瞞天過海都唔容易，因為分分鐘有人掛住你……部電腦，無論查Cookies抑或Proxy記錄，都能清楚知道你辦公時間上網足跡。有網民討論區內求教，希望擺脫「1984式Big
 Brother」監視，但面對此問題，似乎所有人都無解。

4種高危上網行動

今時今日打工仔都非常醒目，想「蛇王」都會開定空白文件遮擋一下。但不少網民指遮掩無用，公司IT絕對有能力查出你瀏覽過的網站，更歸納出以下4種上網高危活動︰

• 上成人網站、賭博網站IT 部會收警示
• 如手機用公司Wi-Fi聯網，瀏覽紀錄亦能被查
• 登入銀行戶口或私人帳戶時使用密碼會有風險
• 如瀏覽低保安程度網站，足跡無所遁形

所以不少人都呼籲大家小心，牽涉個人資料登入網站固然有危機，更要小心用公司電腦搵工、上連登，分分鐘帶來老闆對你特別關懷。

上鹹網都知

有網民分享有同事返工上成人網站以致電腦中毒，要IT搶救之餘仲出warning 
letter令全公司都「知你咩料」。亦有人指同事在公司做compliance，能因應大家的即時訊息而獲知公司所有戀情關係。當然，有公司會封鎖WhatsApp、Facebook等非工作用的網站一了百了。無論公司有何政策，許多醒目仔女絕對只用手機私訊，更申請無限上網plan避用公司Wi-Fi，你又是否其中一員？

灰色地帶

個人資料私隱專員公署就發出過《保障個人資料私隱指引：僱主監察僱員工作活動須知》，僱主可以業務需要為由，合理地監察僱員。亦曾經有個案申訴公司監測員工電腦及僱員瀏覽網頁為不合理，不過「合理」一詞可圈可點，退一步講，就算公司真係有不恰當的監察行為，私隱專員公署第一步都係調解、提供指引。涉事公司只要「跟指引」做事就過關。所以要保障自己，僱員記得用自己手機上私人網站啦！

反監視你個監視

有公司監察電腦使用之外，亦有閉路電視全天候監視僱員工作。只要公司以保障公司財產或者員工安全等理由，就可以合理裝cam。天眼無處不在，員工偷懶、放廁所Break都被人知你離位多久。不過「On9life」專頁就曾分享員工反監視老闆舉動，憑藉幫老闆裝cam順帶在自家手機裝行動偵測器，只要老闆離位「巡場」，都只會見到員工辛勤工作……個案真假無從考據，不過講到尾，打工仔想「吊頸透透氣」，最好用私人電子裝置，否則……「無咩事返出去做嘢啦」！