雖然冇明文規定辭職一定要派散水餅，不過正所謂「散水有相逢」，好來好去，喺Last Day好多人都會選擇派散水餅嚟多謝同事、上司！之但係，派散水餅原來都大有學問？幾時派，次序上派邊個先？收散水餅應該點收？咩人可豁免唔派？唔同國籍嘅同離職，又應該點派？博派定係狂派？今次同大家一文睇清！

禮儀一︰唔食唔畀面？

派散水餅其中一個最令人尷尬嘅位係，同事減緊肥Diet緊，又或者件餅唔太啱自己口味，所以就直接推咗對方唔食！如果係平輩同事就冇乜所謂，但如果係老派或高級過你嘅同事請食餅，有時真係唔食都要收，費事對方多心以為你同佢有心病、唔妥！正所謂再見亦是朋友，所以老虎蟹都攞咗件餅埋位先，最多食一半或轉贈大食同事都得！

禮儀二︰熟人派先定老闆派先？

派散水餅好多人都會就方便，派咗身邊熟人先？但如果根據職場上嘅禮節，一定派俾老闆先，跟住阿頭、Manager、同部門同事……按職級派。

禮儀三︰幾點先好派？

派餅都要搵啱Timing，如果食完lunch派，飯氣攻心就係人都食唔落！所以最佳派餅時機一定係收工前一、兩個鐘，有啲餓意，咁就為之Very Good啦！

禮儀四︰份量預幾多？

正所謂禮多人不怪，所以訂散水餅份量不妨都預鬆少少，派埋畀其他部門曾經合作過嘅同事，reception、admin、會計、it部、茶水清潔阿姐等。仲有就係散水餅最好可以獨立包裝，一人一份，即刻食又得，留返慢慢食亦得；就算同事冇返工，留低都係一份心意。

禮儀五︰咩人可豁免唔派？

派唔派散水餅其實因人而異，又唔係一定要派！不過以下呢幾類人，就可豁免唔派，例如intern實習、part time、freelance等，又或者因為未過試用而離職者，因工作時間短關係，所以唔派都係無可厚非。

另類散水餅推介

嘉頓什餅

旺旺仙貝

Pocky

魚仔餅

樂天熊仔餅

蜜蜂糖

媽咪麵

山渣餅

西樵大餅

摩羅酥

燒賣粉果

乳豬全體

雞蛋仔

麥樂雞

KFC炸雞

譚仔土匪雞翼

IKEA急凍蔬菜薯餅

不同國籍同事之散水禮

香港同事離職通常都會中午食餐散水飯，但唔同國家嘅職場人士退職，都會有唔同禮儀。

日本：日本人好少轉工或離職，所以如果退職都起碼做咗一定年資。所以退職禮上不論男女都會收花，又或者收茶具、手工藝品、美食禮籃、高級筆記本等。

美國：美國人著重實用性和個性化的價值觀，離職通常會收到該同事喜歡嘅物品，如遊戲機、化妝品等，亦有時會收到印有公司標誌的禮品等。

中國：中國人離職通常會收到利是，或紅色的禮物包，象徵著幸運和吉祥，裡面可能係中國茶葉、筆和墨水、紀念品等。

英國︰英國卻沒有「散水餅」這回事。普通的同事，大家會辦一個簡單的餞別午餐就了事。如果是職位比較高級的上司或是老闆就會辦「Leaving Drink」，在辦公室附近的酒吧訂枱，邀約同事放工後到酒吧喝一杯，而酒錢也會是老闆付。